Astudiaethau Jones o Napoli oedd ei gyfraniad mwyaf arbennig a gwreiddiol at y traddodiad braslunio olew, a dyma'r cyntaf ohonyn nhw. Roedd e'n gweithio ar deras to ei lety gyferbyn â'r Dogana del Sale ar y pryd. Y tu hwnt i'r adeilad gyda"i ddillad yn sychu gwelir wal a thŵr Castel Nuova a adeiladwyd yn y 13eg ganrif i'r chwith, a rhan o do a rhodfa'r Palas Brenhinol i'r dde. Mae coed y Largo del Castello'n sefyll rhwng y ddau, ac mae cromenni dwy eglwys a llusern y drydedd ar y gorwel. Mae archwiliadau golau is-goch wedi dangos y tanluniadu helaeth sef brasluniau Jones o'r prif ffurfiau pensaernïol.