Ymson ar draeth
mewn ymateb i Shipwreck a The Fisherman's Return gan Brenda Chamberlain, ac ar ôl 'Galarnad Cwch Enlli'
Cyn inni’u codi nhw – y pedwar
ddaeth i’r lan yn hallt a gwyn
a mynd â nhw’n un rhes i fyny’r allt
i’w hadnabod a’u glanhau, gorau medrwn,
dwi’n dal rhyw obaith (ffôl, mi wn) y byddan nhw’n
cofio am funud nad fel hyn oedd heddiw i fod
o gwbl, ac y byddan nhw – y talpiau cnawd – yn
llithro’n oer o’r graig, yn syllu drwyddan ni
ac yn taflu’u cyrff llarpiedig ’nôl i’r bae;
y cawn eu gwylio nhw’n pellhau, brath
pob sylweddoliad yn llacio’n araf
wrth i’r cyntaf o’r capiau coch
ddiflannu dros ein gorwel; ac yn y pellter,
hithau’r cwch, yn ail-lestreiddio
fesul tamaid ar wyneb ton
nes ei bod yn gyflawn, gywrain, yn gwahodd
yr hogiau i neidio’n wyllt o’r dŵr,
eu siwmperi tew yn sychu’n grimp
a’r braw yn toddi o’u hwynebau
wrth iddi godi’n braf ac
wrth iddyn nhw daflu’r pysgod yn eu holau
a’r rheiny’n ail-loywi, yn ail-fywiocáu
wrth daro’r ewyn, y rhwydi’n
codi’n lân ac yn ailblygu ar y pren;
rhyw obaith (ffôl, mi wn) y poerant eu
brechdanau caws o’u cegau
a’u hail-lapio’n dyner yn eu sgwariau papur
yn barod at gynnau, cyn troi’r cwch
yn ôl tua’r bore bach a’r plant
sydd eto yn eu gwlâu, yn deall dim.
Magwyd Iestyn Tyne yn Llŷn ond mae bellach yn byw ac yn gweithio yng Nghaernarfon. Mae’n llenor, yn gerddor, yn gyfieithydd ac yn artist. Mae’n gyd-sylfaenydd a chyd-olygydd cylchgrawn a chyhoeddiadau’r Stamp, tŷ cyhoeddi Cymraeg annibynnol, gwirfoddol a chydweithredol. Mae wedi pefformio ei waith ledled Cymru a thu hwnt, gan gynnwys taith ddiweddar i India fel rhan o brosiect ecofarddoniaeth y DU ac India. Enillodd Goron Eisteddfod yr Urdd yn 2016 a’i Chadair yn 2019, ac ef yw’r unig un i fod wedi ennill y ddwy brif wobr lenyddol yn eisteddfodau’r Urdd. Rhwng 2019 a 2023, ef oedd Bardd Preswyl cyntaf yr Eisteddfod Genedlaethol. Gyda Leo Drayton, roedd yn awdur Robyn (Y Lolfa, 2021) yng nghyfres Y Pump o nofelau i oedolion ifanc, ac mae’n gyd-olygydd Welsh [Plural] (Repeater, 2022), y gyfrol o ysgrifau am ddyfodol Cymru. Cyrhaeddodd ei gasgliad diweddaraf o farddoniaeth, Stafelloedd Amhenodol (Cyhoeddiadau’r Stamp, 2021) restr fer gwobrau Llyfr y Flwyddyn yn 2022, a chyhoeddwyd trosiad o’r casgliad hwnnw, Unspecified Spaces (Broken Sleep Books, 2023) yn ddiweddar. Ei bamffled diweddaraf o gerddi yw Dysgu Nofio (Cyhoeddiadau’r Stamp, 2023), ac mae'n un o Gymrodorion Cymru'r Dyfodol 2023-25.
