Gosodwaith mawr gan Cerith Wyn Evans yw Radiant Fold (…the Illuminating Gas) a gomisiynwyd ar gyfer Amgueddfa Cymru drwy gynllun Great Works y Gymdeithas Gelf Gyfoes. Ceir adlais yma o waith eiconig Marcel Duchamp, The Bride Stripped Bare by Her Batchelors, Even (1915–23). Mae’r pedwar golau neon yn ymgnawdoliad o’r diagramau optegol cyfrin a alwyd gan Duchamp yn ‘dystion yr ocwlt’. Cynhyrchwyd y gwaith yn benodol ar gyfer Oriel 24 yn Adain y Gorllewin, er mwyn chwarae mig â phensaernïaeth fodernaidd yr ystafell a hanes ehangach yr Amgueddfa a’i chasgliadau.

Ganwyd Cerith Wyn Evans yn Llanelli ym 1958. Ers y 1990au mae ei waith wedi canolbwyntio ar gerflunio a gosodwaith sy’n ymdrin â’n dealltwriaeth o iaith a dirnadaeth. Gwelir ei waith mewn nifer o arddangosfeydd rhyngwladol unigol a grŵp, gan gynnwys comisiwn sylweddol ar gyfer Orielau Duveen Tate Britain yn 2017. Cefnogir cynllun Great Works yn hael gan sefydliad Sfumato gyda’r nod o fynd i’r afael â’r diffyg yn amgueddfeydd y DU o waith artistiaid Prydeinig mawr yr 20 mlynedd diwethaf. Radiant Fold (…the Illuminating Gas) yw’r gwaith cyntaf gan Cerith Wyn Evans i gael ei gaffael i gasgliad cyhoeddus yng Nghymru.