Caiff James Tower ei gysylltu â grwp yr 'Institute of Education' o’r 1950au. Ymhlith yr aelodau eraill oedd William Newland, Margaret Hine a Nicholas Vergette ac roeddent yn gyd-fyfyrwyr ym Mhrifysgol Llundain wedi’r Ail Ryfel Byd. Cawsant eu labelu a’i difrïo gan Bernard Leach fel y 'Picassiettes' ar ôl datblygu eu dull unigryw o addurno â gwydriad tun. Cyn troi at gerameg, bu Tower yn astudio paentio yn yr Academi Frenhinol ac Ysgol Gelf Slade, ac nid oedd felly yn ystyried ei weithiau cerameg yn lestri ymarferol. Disgrifiai ei hun yn hytrach fel artist oedd yn digwydd gweithio â chlai.