Rydyn ni’n byw mewn byd mwy eang nag erioed o’r blaen. Gallwn ni groesi’r lli, hedfan drwy’r awyr, a chyrraedd rhywle cwbl wahanol gyda chlic ar fotwm. Gallwn ni siarad â rhywun ben draw’r byd mewn mater o eiliadau wrth deipio neges, tynnu llun, neu wneud galwad fideo.

Mae artistiaid wedi’u hysbrydoli ers canrifoedd gan symud pobl a chysylltu straeon ym mhedwar ban byd. Boed yn achos teithio, gwaith, gwrthdaro neu drychineb, mae artistiaid yn edrych ar sut fyddwn ni’n dewis, neu’n cael ein gorfodi i symud, a sut fyddwn ni’n gadael ein hôl ar y byd o’n cwmpas.

O deithio’r moroedd i berfformio ar lwyfannau’r byd, mae’r detholiad o weithiau celf isod yn dangos sut mae’n byd yn newid yn barhaus.