Fel rhan o CELF - fe wnaeth artist graffiti o Gaerdydd RMER ONE cael ei gomisynu i greu darn newydd o waith wedi'i hysbydoli gan y casgliad genedlaethol ac yna sgwennu am sut mae e'n creu ei gwaith ef. Darllenwch isod yn ei eiriau ef
Amdana I
Rwy’n artist hunan-ddysgedig ac yn arbenigo mewn celf graffiti ers dros 30 mlynedd. O oedran ifanc, sylweddolais mai celf oedd fy noddfa naturiol i, roeddwn i’n creu ac yn dwdlo drwy’r amser, ond ro’n i yn fy arddegau erbyn i fi weld yr hyn a fyddai’n dod yn ffenomen fyd-eang, Celf Graffiti.
I lawer, mae graffiti yn gyfystyr â theipograffeg, ac er i fi hogi fy sgiliau a fy nhechnegau i ddefnyddio’r can chwistrellu a thrin y paent drwy arddulliau llythrennau, roeddwn i bob amser yn cael fy nenu at elfennau mwy gweledol graffiti, roeddwn i bob amser yn edmygu’r cymeriadau fyddai’n cael eu paentio i gyd-fynd â chynyrchiadau mawr.
Ar ddiwedd y nawdegau, sefydlwyd criw graffiti Cruel Vapours yng Nghaerdydd gyda Hoxe, Skroe, Foe a Dyes. Roedd ein harddulliau’n ategu ei gilydd, ond roedd paentio fel rhan o gydweithfa yn rhoi’r lle a’r rhyddid i fi ganolbwyntio mwy ar gymeriadau a phortreadau.
Ers blynyddoedd rydw i wedi parhau i arbenigo mewn portreadau, ond yn fwy diweddar rydw i wedi esblygu’n raddol tuag at safbwynt mwy mewnsyllol, gan ganolbwyntio ar “y benglog”. Mae hyn bellach wedi dod yn gyfres barhaus, bron yn nodweddiadol o fy ngwaith celf.
I fi, daw’r benglog yn bortread mewnol, heb hidlydd rhywedd, hil na gwahaniaeth, gan ddatgelu’r harddwch sylfaenol rydyn ni i gyd yn ei rannu fel bodau dynol.
Yr Ysbrydoliaeth
Y briff ar gyfer y comisiwn yma oedd cael eich ysbrydoli gan ddarn o celf o casgliad Amgueddfa genedlaethol Caerdydd. Ar ôl archwilio’r casgliadau cefais fy syfrdanu gan yr amrywiaeth o waith celf a oedd ar ddangos.
Dau artist roeddwn i’n gallu uniaethu â’u gwaith oedd Eugène Carrière a Sawangwongse Yawnghwe, ac roeddwn i’n gwybod yn syth sut gallai steil unigryw’r ddau ysbrydoli fy ngwaith nesaf. Roedd gwaith ffigurol Eugène, delweddau allan o ffocws oedd yn ymdebygu i ysbrydion, yn hyfryd iawn, ac fe wnaeth paentiadau ffotorealistig steilus Sawangwongse, oedd yn gwrthdaro â siapiau graffeg llym, ddeffro fy meddwl.
Y Broses
Yn gyffredinol, rwy’n gweithio o ffotograffau ac yn eu trin yn ddigidol i greu fy nghyfansoddiadau a phennu palet lliwiau. Drwy ddylunio fel hyn, rwy’n creu darlun cynnar o sut y bydd y paentiad terfynol yn dod yn fyw. Mae hon bob amser yn broses barhaus lle rwy’n mireinio ac yn esblygu’r dyluniad cyn fy mod i’n barod i roi paent ar gynfas.
O’r fan yna, y cam cyntaf yw trosglwyddo llun llinell i gynfas gwag, rwy’n gwneud hyn gan ddefnyddio techneg grid. Mae’r dull yma’n fy helpu i sicrhau’r cyfrannedd cywir drwy ganolbwyntio a chopïo un adran ar y tro. Unwaith y bydd y dyluniad wedi’i fraslunio, yna mae’n bryd dod â’r caniau chwistrellu allan.
Mae gweithio gyda phaent aerosol ar gynfas yn cymryd amser i’w feistroli oherwydd cyfyngiad yr arwynebedd llai. Dros y blynyddoedd rydw i wedi arbrofi gyda gwahanol dechnegau i drin sut mae’r paent yn cael ei roi, gan weithio bob amser i gael mwy o fanylion yn y darn terfynol.
Dydw i ddim yn defnyddio stensiliau fel arfer ond rydw i wedi dechrau arbrofi’n ddiweddar, ac ar gyfer adran graffig y paentiad yma gweithiodd y dechneg stensil mor dda fel ei bod hi bellach yn rhywbeth yr hoffwn gynnwys mwy ohoni yn fy ngwaith yn y dyfodol.
Mae’r daith rydw i wedi bod arni drwy gydol y comisiwn yma, ar adegau, wedi mynd â fi allan o fy man cysurus creadigol, ond yn y pen draw mae wedi gwthio ffiniau fy null arferol ac wedi fy helpu i gymryd y naid i fyd newydd o ran fy steil.
Wedi'ch hysbrydoli? Beth allwch chi ddarganfod yn y casgliad genedlaethol neith eich tanio chi i greu gwaith newydd?
