Mae Carreg Ateb: Vision or Dream? yn dod â gweithiau sydd newydd eu comisiynu gan artistiaid Cymreig ynghyd â gweithiau gan Jeremy Deller a gwrthrychau casgliad arwyddocaol o Amgueddfa Cymru, Storiel, ac Amgueddfa Llandudno mewn arddangosfa newydd o 21 Mehefin - 27 Medi 2025.
Carreg Ateb: Vision or Dream? Mostyn 2025, Ffotograffiaeth gan Rob Battersby
“Carreg Ateb” yw enw craig y credir ei bod yn achosi adlais, carreg sy’n ateb. Yn y cyd-destun hwn mae’r arddangosfa’n gwahodd myfyrdodau ar sut rydym yn gwrando ar y gorffennol a sut rydym yn dychmygu’r dyfodol. Gan symud rhwng cof a deunydd, hunaniaeth a thrawsnewidiad, breuddwyd a gweledigaeth, mae’r artistiaid yn ymgysylltu â’r tir, ieithoedd, a hanesion haenog sy’n llunio Cymru gyfoes.
Mae cerfluniau gwiail seremonïol Lewis Prosser, sydd wedi’u hysbrydoli gan wisgoedd dinesig, yn ymgorffori pŵer ar raddfa ddynol sydd wedi’i wreiddio yn y gymuned; mae gosodiad amlgyfrwng Esyllt Angharad Lewis yn ailymweld â thâp VHS plentyndod sy’n dogfennu drama ysgol am Derfysgoedd Rebecca, gan gyfuno archif, adrodd straeon, a pherfformiad i ddychmygu dyfodol posibl eraill; mae fideo tair sianel Llyr Evans – dyn yn chwarae gemau ar ei ben ei hun, tiwniwr piano mewn neuadd wag, ac arwerthiant gwartheg byw – yn archwilio sut mae systemau gwerth, perfformiad, a rheolaeth yn llunio ein realiti emosiynol a diwylliannol; mae gwaith delwedd symudol Gweni Llwyd yn archwilio chwareli fel mannau o bosibilrwydd, creadigrwydd, a chysylltiad yn hytrach na gweddillion llafur a cholled; mae gosodiad cyffyrddol Sadia Pineda Hameed yn dod yn borth, neu’n weithred o groesi ffiniau, negodi hunaniaeth, a thrawsnewid yr hunan yng nghyd-destun mudo.
Carreg Ateb: Vision or Dream? Mostyn 2025, Ffotograffiaeth gan Rob Battersby
Ochr yn ochr â’r comisiynau hyn mae gweithiau allweddol gan Jeremy Deller sy’n ymwneud â hanes diwylliannol Cymru a chreu mythau gwerinol gan gynnwys The Uses of Literacy, casgliad o gelfyddyd ffans y Manic Street Preachers, a So Many Ways to Hurt You, portread dogfennol o reslwr proffesiynol a glöwr Adrian Street ynghyd â murlun newydd gan Heidi Plant. Mae baner safle-benodol newydd ei chomisiynu gan gydweithiwr hirdymor Ed Hall hefyd yn rhan o’r prosiect.
Carreg Ateb: Vision or Dream? Mostyn 2025, Ffotograffiaeth gan Rob Battersby
Carreg Ateb: Vision or Dream? Mostyn 2025, Ffotograffiaeth gan Rob Battersby
Carreg Ateb: Vision or Dream? Mostyn 2025, Ffotograffiaeth gan Rob Battersby
Mae’r gweithiau hyn wedi’u gosod mewn sgwrs â gweithiau celf ac arteffactau o gasgliadau amgueddfeydd Cymru; cerfluniau wedi’u gwneud o wastraff llechi gan Syr John Kyffin Williams, cerfiadau llechi cymhleth gan weithwyr chwarel a wnaed yn y 19eg ganrif, clytwaith cymhleth wedi’i wneud o frethyn wedi’i ailgylchu, lluniadau atseiniol plant o ryfel cartref Sbaen, baner heddwch gan Ian Campbell; ffotograffau Peter Finnemore o lyfrau ysgol ei nain; replica o “Welsh Not” a ddarganfuwyd mewn ysgol yng ngogledd Cymru.
Gyda’i gilydd, mae’r arddangosfa’n gofyn: sut rydyn ni’n clywed y gorffennol yn siarad, a pha atebion rydyn ni’n eu ceisio o le. Mae Carreg Ateb: Vision or Dream? yn myfyrio ar ofodau go iawn a dychmygol, safle o atgofion dwfn, traddodiad radical, a dyfodol gweledigaethol.
Wedi’i gyd-guradu gan Jeremy Deller, Kalliopi Tsipni-Kolaza, Joanna Wright ac mewn cydweithrediad â chyfranogwyr ifanc y cwmni yng Nghwmni Theatr Frân Wen.
Mae’r arddangosfa’n cyd-fynd â NG200: Triumph of Art, prosiect cenedlaethol gan yr artist Jeremy Deller, Oriel Genedlaethol Llundain, a gomisiynwyd gan Oriel Genedlaethol Llundain, fel rhan o NG200, ei dathliadau Daucanmlwyddiant. Mae Triumph of Art yn cael ei ddatblygu mewn partneriaeth â Mostyn yn Llandudno, Coleg Celf a Dylunio Duncan of Jordanstone yn Dundee, The Box yn Plymouth a The Playhouse yn Derry-Londonderry. Cefnogir gan Art Fund.
Cefnogir Carreg Ateb: Vision or Dream? gan Gyngor Celfyddydau Cymru, Cadw a Chyngor Sir Gwynedd. Cefnogir yr arddangosfa ym Mostyn gan CELF, Oriel Gelf Gyfoes Genedlaethol Cymru, The Colwinston Charitable Trust, Foyle Foundation, Sefydliad Cymunedol Cymru, Ystadau Mostyn a PPG Paints.
Gyda diolch arbennig i The Modern Institute, Glasgow; Amgueddfa ac Oriel Gelf Storiel, Bangor; Amgueddfa Llandudno; Casgliad Cyngor Celfyddydau; Oriel CARN a Chyngor Conwy.
